Gupt Navratri 2022 : गुप्त नवरात्रीला जुळून येतोय हा शुभ योग, जाणून घ्या मुहूर्त आणि महत्त्व

Gupt Navratri 2022 : आषाढ महिन्यातील गुप्त नवरात्रीच्या 9 दिवशी दुर्गा देवीच्या विविध रूपांची पूजा केली जाते. या उत्सवादरम्यान दुर्गा देवीची विधिवत पूजा केल्याने जीवनात सुख-समृद्धी नांदते.

Gupt Navratri 2022 : हिंदू धर्मात दुर्गा देवीला (Durga Devi) आदिशक्ती मानले जाते. पंचांगानुसार, देवी दुर्गाची नवरात्र (Navratri) वर्षातून चार वेळा साजरी केली जाते. यामध्ये शारदीय (Sharadiy Navratri) आणि चैत्र नवरात्री (Chaitra Navratri) देशभरात थाटामाटात साजरी केली जाते. त्याचवेळी माघ आणि आषाढमध्ये येणारी गुप्त नवरात्रीही (Gupt Navratri) तितकीच महत्त्वाची आहे. गुप्त नवरात्रीत दुर्गा मातेच्या 9 रूपांची पूजा केली जाते. या उत्सवात विधिवत पूजा-विधी (Gupt Navratri Puja Vidhi) केल्यास भक्तांच्या मनोकामना पूर्ण होतात अशी मान्यता आहे. यावेळी आषाढ महिन्यातील गुप्त नवरात्र 30 जूनपासून सुरू होत आहे. यंदाची ही गुप्त नवरात्री विशेष असून या नवरात्रीत अनेक शुभ योग जुळून येत आहे. गुप्त नवरात्रीमध्ये तंत्र-मंत्र आणि तंत्रविद्येची साधना केली जाते. या लेखाच्या माध्यमातून आम्ही तुम्हाला सांगणार आहोत गुप्त नवरात्री उत्सवादरम्यान काय करावे आणि काय करू नये?. चला तर मग जाणून घेऊया माहिती.

हे आहे गुप्त नवरात्रीचे महत्त्व

देवी दुर्गाच्या गुप्त नवरात्रीमध्ये तंत्र-मंत्र, जादूटोणा, वशीकरण इत्यादी सिद्धी प्राप्तीसाठी ध्यान केले जाते. त्याचबरोबर दुर्गा देवीच्या कठोर तपश्चर्येने आणि भक्तीने माता प्रसन्न होते आणि भक्तांच्या सर्व मनोकामना पूर्ण करते अशी मान्यता आहे.

देवीच्या 9 रूपांची केली जाते पूजा

गुप्त नवरात्री दरम्यान, 9 दिवसात दुर्गा देवीच्या 9 रुपांची पूजा केली जाते. शैलपुत्री, ब्रह्मचारिणी, चंद्रघंटा, कुष्मांडा, स्कंदमाता, कात्यायनी, कालरात्री, महागौरी, सिद्धिदात्री या नऊ रूपांची पूजा केली जाते. गुप्त नवरात्रीमध्ये तारा, त्रिपुरा सुंदरी, भुनेश्वरी, छिन्नमस्ता, काली, त्रिपुरी भैरवी, धुमावती, बगलामुखी माता या महाविद्या देवींची पूजा विधीपूर्वक केली जाते.

गुप्त नवरात्रीच्या पहिल्याच दिवशी जुळून येत आहे हे शुभ योग

गुप्त नवरात्रीच्या पहिल्या दिवशी गुरु पुष्य योग, सर्वार्थ सिद्धी योग, अमृत सिद्धी योग, अदल योग, विदाल योग आणि ध्रुव योग जुळून येत आहेत. ज्योतिषशास्त्रानुसार या काळात कोणतेही नवीन कार्य सुरू करणे आणि धार्मिक कार्य करणे शुभ मानले जाते. वाद मिटवणे, तडजोड करणे आणि नाराज लोकांचे मन वळवणे यासाठी हे योग शुभ मानले जातात. एवढेच नाही तर कामात यश मिळते आणि मान-सन्मान वाढतो.

पाळा हे नियम

ब्रह्मचर्य व्रत- गुप्त नवरात्रीच्या दिवसांमध्ये दुर्गा देवीची पूजा केली जाते. या दरम्यान 9 दिवस ब्रह्मचर्य व्रत पाळले जाते.

तामसी भोजनाचा त्याग- गुप्त नवरात्रीमध्ये तामसी भोजनाचा त्याग करावा. जेवणात लसूण आणि कांद्याचा समावेश करू नका.

चटईवर झोपा- गुप्त नवरात्रीत नऊ दिवस भक्तांनी अंथरुणाऐवजी चटईवर झोपावे.

या रंगाचे कपडे घाला- ज्योतिषशास्त्रानुसार या नऊ दिवसात पिवळे किंवा लाल रंगाचे कपडे परिधान करावेत.

फळं खा- जर तुम्ही गुप्त नवरात्रीचे व्रत ठेवत असाल तर या काळात नुसती फळं खा.

सेवा करा- गुप्त नवरात्री दरम्यान मनापासून दुर्गा देवीची आराधना करा. सोबत आईवडिलांची सेवा आणि आदर करा.

(टीप – या लेखात दिलेली माहिती गृहितके आणि माहितीवर आधारित आहे. india.com याचे समर्थन करत नाही. अधिक माहितीसाठी तज्ज्ञांशी संपर्क साधा.)